धनगढी – नेपालीहरूको महान पर्व तिहार तथा ‘बहुमुखी कला मन्दिर’ गोदावरी, कैलालीको १४ औँ वार्षिकोत्सवकाे शुभ अवसरमा गोदावरी नगरपालिका वडा- ३ कार्यालयको सहयोग तथा समन्वय र बहुमुखी कला मन्दिरको आयोजनामा नगरपालिका स्तरीय ‘गोदावरी वडाध्यक्ष कप पुरुष भलिबल प्रतियोगिता’ हुने भएको छ ।

हरेक वर्ष कला मन्दिरकाे वार्षिकोत्सवका अवसरमा स्थानीय स्तरमा गर्दै आएका विभिन्न कार्यक्रम बिस्तार गर्दै यस पटक अन्तर वडा पुरुष भलिबल प्रतियोगिता समेत आयोजना गरिएको हो ।

भलिबल प्रतियोगितामा प्रथम पुरस्कार ५५ हजार ५ सय ५५, द्वितीय पुरस्कार २५ हजार ५ सय २५, तृतीय पुरस्कार  ११ हजार १ सय ११ र व्यक्तिगत विधामा २ हजार २ सय २२ नगद रुपैयाँ सहित विजयी सबै टिमहरूलाई ट्रफी, मेडल र  प्रमाणपत्र  दिइने बहुमुखी कला मन्दिरका अध्यक्ष राम बहादुर बोगटीले जानकारी दिए ।

यसका साथै गोदावरी खुला पुरुष सडक दौड प्रतियोगीता ५ किमी र नगरव्यापी खुला मावि स्तरीय हाजिरीजवाफ प्रतियोगिता पनि हुने भएको छ । दौड प्रतियोगितामा विजयी प्रथम द्वितीय तृतीय खेलाडीहरूलाई क्रमशः नगद रु १० हजार १ सय , ५ हजार ५ सय, ३ हजार ३ सय नगद रुपैयाँ र यसका साथै ट्रफी, मेडल र  प्रमाणपत्र को व्यवस्था गरिएको छ । हाजिरी जवाफ प्रतियोगिताका बिजयी समूहहरुलाई भने ट्रफी, मेडल र  प्रमाणपत्र प्रदान गरिने छ ।

खेलकुद, कला, साहित्य समाजसेवा र संस्कृतिक तथा शैक्षिक विभिन्न ल क्षेत्रमा काम गर्दै आइरहेको बहुमुखी कला मन्दिरले बिगतका वर्षहरुमा पनि चाड पर्वको समयमा विभिन्न विकृति र जुवा तासमा बेस्त हुने युवाहरुलाई खेलकुदमा बेस्त बनाएर सामाजिक विकृतिमा न्यूनीकरण ल्याउन र शिक्षा, संस्कृति तथा खेलकुदको विकास गर्न विभिन्न कार्यक्रम गर्दै आएको थियो । यस बहुमुखी कला मन्दिरले कार्यक्रमको क्षेत्र र सहभागीता थप व्यापक बनाउने उदेश्य सहित नगरस्तरीय कार्यक्रम गर्न लागेको जानकारी अध्यक्ष बोगटीले दिए ।

यसपटक वडाको पनि सहयोग रहेको हुँदा नगरव्यापी नै कार्यक्रम गरेर नगरको उत्कृष्ट भलिबल टिम र उत्कृष्ट  धावक छनौट तथा पहिचान गरि उनीहरूको खेल जीवनमा थप अवसर प्रदान गर्ने अध्यक्ष बोगटीले बताए । गोदावरी- ३ मुक्तिनगर स्थित मुक्ति आधारभूत विद्यालयको प्राङ्गणमा  कार्तिक १६ गते देखि १९ गतेसम्म हुने सम्पूर्ण प्रतियोगितामा टिम तथा खेलाडी दर्ता फारम बहुमुखी कला मन्दिरकै आधिकारिक पेजमा उपलब्ध टिम तथा खेलाडी दर्ता फारमको लिन्क खोलेर अन्लाइनबाटै भर्न सकिने र अन्लाइन भर्न असमर्थको लागि गोदावरी- ३ मुक्तिनगरमै अवस्थित अंशु मोबाइल ग्यालरीबाट फारम लिएर सोही स्थानमा नै  बुझाउने सकिने छ ।

खुला सडक दौड प्रतियोगितामा खुला रूपमा जोसुकै खेलाडीहरू सहभागी भए हुनसक्ने छन् । भलिबल र हाजिरी जवाफ प्रतियोगितामा भने गोदावरी नगरकै खेलाडी मात्र सहभागी हुन पाउने र भलिबल टिममा बढीमा २ जना खेलाडीहरू खुला रूपमा टिममा राख्न पाइने प्रतियोगिताको नियम रहेको छ ।