काठमाडौं । अब व्यक्तिगत घटना दर्ताको प्रमाणपत्रमा उल्लेखित नाम, थर, उमेर वा अन्य विवरणमा त्रुटि भएमा एक पटक सुधार गर्न पाइने भएको छ। सरकारले केही नेपाल ऐनहरू संशोधन गर्दै राष्ट्रिय परिचयपत्र तथा पञ्जीकरण ऐन, २०७६ मा संशोधन गरेर यस्तो व्यवस्था गरेको हो।
नयाँ व्यवस्थाअनुसार, विवरण सच्याउन चाहने व्यक्तिले स्थानीय पञ्जिकाधिकारी (वडा कार्यालय) मा तोकिएको ढाँचामा निवेदन दिनुपर्नेछ।
पहिला ऐनको दफा २५(१) अनुसार, ऐन लागू भएपछि जन्मिएका बालबालिकाको विवरण मात्र — जस्तै नाम, थर, उमेर आदि — दर्ता भएको मितिले एक वर्षभित्र मात्र सुधार गर्न सकिने व्यवस्था थियो।
तर संशोधनपछि, अब कुनै पनि व्यक्तिले एक पटक विवरण सच्याउन सक्ने व्यवस्था गरिएको छ, उमेरको सन्दर्भमा कुनै सीमा नराखी।
दर्ता विवरण सच्याइएको जानकारी स्थानीय पञ्जिकाधिकारीले राष्ट्रिय परिचयपत्र तथा पञ्जीकरण विभागलाई उपलब्ध गराउनुपर्नेछ। त्यसको आधारमा विभागले संबन्धित व्यक्तिको परिचय नम्बर रहेको विवरणमा समेत सुधार गर्नेछ।
